विस्तारित आकांक्षित तालुका कार्यक्रम; जिल्ह्यातील आठ तालुक्यांना मिळणार विकासाची नवी चालना

 आकांक्षित तालुका कार्यक्रमात प्रायोगिक तत्वावर 6 तालुक्यांचा समावेश

-प्रत्येक तालुक्याला पाच कोटींचा निधी

यवतमाळ, दि. 12 (जिमाका): महाराष्ट्र शासनाद्वारे राज्यातील संतुलित व सर्वांगीण विकासासाठी आकांक्षित तालुका कार्यक्रमाचा विस्तार करण्यात आला असून राज्यातील 10 जिल्ह्यांची व एकूण 177 तालुक्यांची 'विस्तारित आकांक्षित जिल्हे व तालुके' म्हणून निवड करण्यात आली आहे.

या कार्यक्रमांतर्गत यवतमाळ जिल्ह्यातील विस्तारित आकांक्षित तालुका म्हणून समावेश करण्यात आलेल्या केळापूर, मारेगाव, महागाव, घाटंजी, उमरखेड व दिग्रस या 6 तालुक्यांचा समावेश प्रायोगिक तत्वावर एक वर्षासाठी करण्यात आलेला आहे. तसेच पुसद व झरीजामणी या 2 तालुक्याचा केंद्र शासनाकडून आकांक्षित तालुका म्हणुन समावेश यापुर्वीच करण्यात आलेला आहे.

तसेच राज्य शासनामार्फत सर्व 177 आकांक्षित तालुक्यांमध्ये प्रायोगिक तत्वावर एक वर्षाकरिता आकांक्षित तालुका कार्यक्रम 2026-27 राबविण्यास मंजुरी देण्यात आली आहे. या कार्यक्रमांतर्गत सर्व तालुक्यांना  5 कोटी रुपये प्रती तालुका इतका निधी अनुदान स्वरुपात देण्यात येईल. तसेच सर्वोत्कृष्ट कामगिरी केलेल्या तालुक्यांना सन 2026-27 मध्ये अतिरिक्त प्रोत्साहन निधी पुरस्कार स्वरुपात उपलब्ध करुन देण्यात येणार असल्याची माहिती जिल्हा नियोजन अधिकारी सुधाकर आडे यांनी दिली आहे.

या विस्तारित आकांक्षित तालुका कार्यक्रमांतर्गत नागरिकांचा सक्रीय सहभाग, स्थानिक संस्था स्तरावरील समन्वय, स्वयंसेवी संस्था, महिला बचत गट व इतर स्थानिक घटकांच्या सहकार्याने विकास कामांना गती देण्यात येणार आहे.