माझी लाडकी बहीण योजनेसाठी ई-केवायसीसंदर्भात अफवांवर विश्वास ठेवू नका

जिल्हा महिला व बालविकास कार्यालयाचे आवाहन "मुख्यमंत्री माझी लाडकी बहीण" या योजनेंतर्गत ई-केवायसी करु न शकलेल्या महिलांना जिल्ह्याच्या महिला व बाल विकास कार्यालयात कागदपत्रे सादर करण्याचे निर्देश शासनस्तरावरुन देण्यात आलेले नाहीत, अशी माहिती जिल्हा महिला व बालविकास अधिकारी मारोती पवार यांनी दिली आहे. या योजनेअंतर्गत ई-केवायसीसाठी महिलांना जिल्ह्यांच्या महिला व बाल विकास विभागात कागदपत्रे सादर करण्याची मुभा देण्यात आल्याची अफवा पसरविण्यात आली आहे. या अफवांमुळे योजनेच्या लाभार्थी महिलांमध्ये संभ्रम निर्माण होत आहे. त्यामुळे महिला व बाल विकास अधिकारी कार्यालय शहर व तालुकास्तर कार्यालयात महिलांचा जमाव होत आहे. ही वस्तुस्थिती लक्षात घेता महिलांनी चुकीच्या बातम्या व अफवांवर विश्वास ठेवू नये, असे आवाहन करण्यात आले आहे.