अधिकारी व कर्मचाऱ्यांच्या क्षमता विकासासाठी ‘साधना सप्ताह’

 आयगॉट कर्मयोगीवर ४ तासांचे कोर्स पूर्ण करणे बंधनकारक  ….अन्यथा वेतन नाही  ११६६ अधिकारी-कर्मचाऱ्यांचे कोर्स पूर्ण यवतमाळ, दि. 9 (जिमाका) : राज्य शासनाच्या निर्देशानुसार २ एप्रिल ते १० एप्रिल या कालावधीत "साधना सप्ताह" आयोजित करण्यात आलेला आहे. या "साधना सप्ताह" अंतर्गत सर्व शासकीय अधिकारी व कर्मचाऱ्यांनी या कोर्सेसमध्ये सहभागी होऊन निर्धारित कालावधीत किमान ४ कोर्स व ४ तास कोर्स पूर्ण करणे बंधनकारक असल्याची माहिती जिल्हाधिकारी विकास मीना यांनी बुधवारी महसूल भवन येथे आयोजित पत्रकार परिषदेत दिली. या "साधना सप्ताह" अंतर्गत अधिकारी व कर्मचाऱ्याच्या क्षमता विकासासाठी आय गॉट कर्मयोगी प्लॅटफॉर्मवरील एकूण ५० विविध प्रशिक्षण कोर्सेस उपलब्ध करून देण्यात आले आहेत. सर्व शासकीय अधिकारी व कर्मचाऱ्यांनी या कोर्सेसमध्ये सहभागी होऊन निर्धारित कालावधीत किमान ४ कोर्स व ४ तास कोर्स पूर्ण करणे बंधनकारक आहे. शासनाच्या प्राप्त परिपत्रकानुसार, "साधना सप्ताह" दरम्यान संबंधित कोर्सेस पूर्ण न करणाऱ्या अथवा निर्देशांचे पालन न करणाऱ्या अधिकारी-कर्मचाऱ्यांचे वेतन संबंधित कालावधीसाठी काढण्यात येणार नाही. जिल्हाधिकारी कार्यालय अंतर्गत व अधिनस्त सर्व कार्यालयातील एकूण १५५३ अधिकारी व कर्मचारी यांनी आयगॉट कर्मयोगी प्लॅटफॉर्मवर नोंदणी केलेली आहे. त्यापैकी एकूण ११६६ अधिकारी व कर्मचारी यांनी ४ तासाचे कोर्स पूर्ण केलेले आहे. हा उपक्रम शासनाच्या "कर्मयोगी अभियान" अंतर्गत अधिकारी व कर्मचाऱ्यांच्या कौशल्य विकासासाठी महत्वपूर्ण असून, सर्वांनी यामध्ये सक्रिय सहभाग नोंदवावा, असे आवाहन जिल्हाधिकारी विकास मीना यांनी यावेळी केले.