Posts

Showing posts from October, 2026

जिल्हाधिकारी कार्यालयात राष्ट्रीय एकता दिवस साजरा

Image
सरदार वल्लभभाई पटेल व इंदिरा गांधी यांना अभिवादन; अधिकारी-कर्मचाऱ्यांनी घेतली राष्ट्रीय एकतेची शपथ यवतमाळ, दि. ३१ : देशाचे माजी गृहमंत्री लोहपुरुष सरदार वल्लभभाई पटेल यांच्या जयंतीनिमित्त राष्ट्रीय एकता दिवस तसेच माजी पंतप्रधान इंदिरा गांधी यांच्या पुण्यतिथीनिमित्त राष्ट्रीय संकल्प दिवस जिल्हाधिकारी कार्यालयात शनिवारी साजरा करण्यात आला. शासन निर्णयातील निर्देशानुसार जिल्हाधिकारी कार्यालयातील महसूल भवन येथे निवासी उपजिल्हाधिकारी अनिरुद्ध बक्षी यांच्या हस्ते सरदार वल्लभभाई पटेल यांच्या प्रतिमेस पुष्पहार अर्पण करून अभिवादन करण्यात आले. तसेच इंदिरा गांधी यांच्या स्मृतिदिनानिमित्त त्यांच्या प्रतिमेस पुष्पहार अर्पण करून त्यांना आदरांजली वाहण्यात आली. यावेळी राष्ट्रीय एकता दिवसानिमित्त बचत भवन येथे उपस्थित अधिकारी व कर्मचाऱ्यांनी राष्ट्रीय एकतेची शपथ घेतली. देशाची एकता आणि अखंडता राखण्याचा संकल्प यावेळी करण्यात आला. कार्यक्रमाला उपविभागीय अधिकारी गोपाळ देशपांडे, तहसीलदार डॉ. योगेश देशमुख यांच्यासह जिल्हाधिकारी कार्यालयातील अधिकारी व कर्मचारी उपस्थित होते.

माजी सरन्यायाधीश भुषण गवई यांच्या हस्ते पुसद येथील प्रस्तावित वकील भवनाचे भूमीपूजन

Image
> कोनशिलेचेही केले अनावरण > प्रस्तावित वकील भवनाला स्व. वसंतराव नाईक यांचे नाव देण्याची केली घोषणा : यवतमाळ, दि. ३१ : पुसद येथील जिल्हा सत्र न्यायालय परिसरातील प्रस्तावित वकील भवनाचे भूमीपूजन व कोनशिलेचे अनावरण भारताचे माजी सरन्यायाधीश भुषण गवई यांच्या हस्ते आज शनिवारी दि. ३१ ऑक्टोबर रोजी करण्यात आले. या समारंभाला मुंबई उच्च न्यायालयाच्या नागपूर खंडपीठाचे न्यायमूर्ती अनिल किलोर, न्यायमूर्ती वृषाली जोशी, न्यायमूर्ती प्रवीण पाटील, न्यायमूर्ती राज वाकोडे, पालकमंत्री ना. संजय राठोड, राज्यमंत्री ना. इंद्रनिल नाईक, प्रधान जिल्हा न्यायाधीश आनंद यावलकर, जिल्हा न्यायाधीश एस जे रामगडिया, नगराध्यक्ष मोहिनी नाईक, महाराष्ट्र आणि गोवा बार कौन्सिलचे अध्यक्ष जयंत जायभाये, उपाध्यक्ष रंजना भोसले, सदस्य ॲड आशिष देशमुख, वकील संघाचे अध्यक्ष ॲड भारत जाधव, वकील संघाचे पदाधिकारी, विधीज्ञ आदी मान्यवर उपस्थित होते. माजी सरन्यायाधीश न्यायमूर्ती भुषण गवई यांनी मनोगत व्यक्त करतांना पोहरादेवी येथील भेटी दरम्यान आलेले अनुभव विषद केले. तसेच संत सेवालाल महाराज्याच्या विचारांची उजळणी केली. यासह पुसदच्या...

शेतकऱ्यांनी घरचे सोयाबीन बियाणे वापरावे

Image
> तालुका कृषी अधिकारी यांचे आवाहन > घरगुती सोयाबीन बियाणे जतन व साठवणूक मोहीम यवतमाळ, दि. 30 (जिमाका) : एल निनोच्या प्रभावामुळे चालू वर्षात पर्जन्यमानात घट झाल्याने खरीप हंगामातील प्रमुख पिकांच्या उत्पादनावर परिणाम झाला आहे. अमरावती विभागातील प्रमुख खरीप पीक असलेल्या सोयाबीनच्या उत्पादनात घट होण्याची शक्यता लक्षात घेता, पुढील वर्षी बियाण्यांची उपलब्धता कमी पडण्याची शक्यता आहे. या पार्श्वभूमीवर कृषी विभागामार्फत घरगुती सोयाबीन बियाणे जतन व साठवणुकीसाठी मोहीम राबविली जात आहे. या मोहिमेअंतर्गत पुढील वर्षी चांगल्या दर्जाचे व जास्त किमतीत सोयाबीन बियाणे उपलब्ध होण्यासाठी शेतकऱ्यांनी घरचे बियाणे वापरण्याचे आतापासूनच नियोजन करावे, असे आवाहन तालुका कृषी अधिकारी, यवतमाळ यांनी केले आहे. ज्या शेतकऱ्यांकडे चांगल्या दर्जाचे सोयाबीन बियाणे उपलब्ध आहे, त्यांनी ते पुढील खरीप हंगामातील पेरणीसाठी राखून ठेवावे. समाधानकारक दर्जाचे सोयाबीन उत्पादन घेतलेल्या शेतकऱ्यांनी स्वतःच्या गरजेपुरते बियाणे जतन करावे. तसेच, परिसरातील गरजू शेतकऱ्यांनाही चांगल्या दर्जाचे बियाणे उपल...

गोवारी समाजातील नवउद्योजकांना १५ टक्के मार्जिन मनी मिळणार

>नवउद्योजकांनी प्रस्ताव सादर करण्याचे आवाहन यवतमाळ, दि. 30 (जिमाका) : केंद्र शासनाच्या स्टँड अप इंडिया योजनेंतर्गत महाराष्ट्र राज्यातील विशेष मागास प्रवर्गातील अनुसूचित जमातीच्या सवलतींसाठी पात्र असलेल्या गोवारी समाजातील नवउद्योजक लाभार्थ्यांना राज्य शासनामार्फत प्रकल्प किमतीच्या लाभार्थी हिश्श्यातील जास्तीत जास्त १५ टक्के मार्जिन मनी उपलब्ध करून देण्यास शासन मान्यता देण्यात आली आहे. या योजनेचा लाभ घेण्यासाठी पात्र नवउद्योजकांनी प्रकल्प किमतीच्या १० टक्के रक्कम स्वहिश्श्याच्या स्वरूपात भरल्यानंतर आणि बँकेने स्टँड अप इंडिया योजनेंतर्गत ७५ टक्के कर्ज मंजूर केल्यानंतर उर्वरित १५ टक्के फ्रंट एंड सबसिडी राज्य शासनामार्फत उपलब्ध करून देण्यात येणार आहे. स्टँड अप इंडिया योजनेंतर्गत पात्र ठरलेल्या गोवारी समाजातील सवलतींसाठी पात्र नवउद्योजक लाभार्थ्यांनी या योजनेचा लाभ घेण्यासाठी आपले प्रस्ताव सादर करावेत, असे आवाहन इतर मागास बहुजन कल्याण विभागाचे सहाय्यक संचालक दीपक मान्टे यांनी केले आहे. 000000

४ नोव्हेंबरला सुशिक्षित बेरोजगार अभियंत्यांची काम वाटप सभा

यवतमाळ, दि. 30 (जिमाका) : सार्वजनिक बांधकाम मंडळ, यवतमाळ अंतर्गत सुशिक्षित बेरोजगार अभियंत्यांची काम वाटप सभा बुधवार, दिनांक ४ नोव्हेंबर रोजी दुपारी २ ते ३ वाजेपर्यंत सार्वजनिक बांधकाम मंडळ सभागृह, यवतमाळ येथे आयोजित करण्यात आली आहे. या सभेसाठी सुशिक्षित बेरोजगार अभियंत्यांनी ओळखपत्र व आवश्यक कागदपत्रांसह उपस्थित राहावे, असे आवाहन सार्वजनिक बांधकाम विभागाचे अधीक्षक अभियंता वि. अ. शिरभाते यांनी केले आहे. 000000

बेंबळा धरणात पिण्याचा पाणीसाठा सुरक्षित ठेवण्यास प्राधान्य ; रब्बी हंगामासाठी पाणी सोडणे शक्य नाही Ø पाण्याचा काटकसरीने वापर करण्याचे आवाहन

यवतमाळ, दि. 30 (जिमाका) : बेंबळा नदी प्रकल्पातील मर्यादित पाणीसाठ्यामुळे यंदाच्या रब्बी हंगामासाठी सिंचनाकरिता पाणी सोडणे शक्य होणार नाही. त्यामुळे प्रकल्पाच्या लाभक्षेत्रातील शेतकऱ्यांनी पाण्याची उपलब्धता लक्षात घेऊन पेरणीचे नियोजन करावे, असे आवाहन बेंबळा प्रकल्प विभागाचे कार्यकारी अभियंता यांनी केले आहे. जलसंपदा विभागाच्या ५ ऑक्टोबर २०२६ रोजीच्या शासन निर्णयातील मार्गदर्शक सूचनांनुसार, अल-निनोच्या प्रभावामुळे ३१ ऑगस्ट २०२७ पर्यंत जिल्ह्यातील नागरिकांना पिण्याच्या पाण्याची टंचाई भासू नये, यासाठी पिण्याच्या पाण्याचा साठा सुरक्षित ठेवण्यास सर्वोच्च प्राधान्य देण्यात आले आहे. बेंबळा धरणातील उपलब्ध पाणीसाठा, पिण्याच्या पाणी आणि बाष्पीभवन वजा करता सिंचनासाठी केवळ एका पाणी आवर्तन देता येईल इतका पाणीसाठी शिल्लक होता. खरीप हंगामातील कापूस व तूर या पिकांचे नुकसान टाळण्यासाठी लाभक्षेत्रातील शेतकऱ्यांनी संरक्षक पाणी आवर्तनाची मागणी केली होती. त्यानुसार १५ ऑक्टोबर २०२६ रोजी खरीप पिकांसाठी प्रकल्पातून पाणी सोडण्यात आले. सद्यस्थितीत बेंबळा प्रकल्...

लोकशाही दिन 2 नोव्हेंबरला

यवतमाळ, दि. 30 (जिमाका) : जनतेच्या तक्रारी व समस्या सोडविण्यासाठी दर महिन्याच्या पहिल्या सोमवारी लोकशाही दिन आयोजित करण्यात येते. त्यानुसार नोव्हेंबर महिन्याचा जिल्हा लोकशाही दिन सोमवारी दि. 2 नोव्हेंबर 2026 रोजी सकाळी 10 वाजता बचत भवन, जिल्हाधिकारी कार्यालय येथे आयोजित करण्यात आला आहे. जिल्हा लोकशाही दिनामध्ये न्याय प्रविष्ट प्रकरणे, राजस्व अपिल प्रकरणे, सेवा, आस्थापना विषयक बाबी, विहीत नमुन्यात नसणारे व आवश्यक त्या कागदपत्राच्या प्रती न जोडलेले अर्ज, अंतिम उत्तर दिलेले आहे असे पत्र स्वीकारण्यात येणार नाही. वैयक्तिक स्वरुपाची तक्रार, निवेदन सादर करुन नये. महिन्यातील तिसऱ्या सोमवारी तालुका स्तरावर लोकशाही दिनाचे आयोजन करण्यात येते. त्यामध्ये अर्जाचे निराकरण न झाल्यास जिल्हास्तरीय लोकशाही दिनामध्ये अर्ज सादर करावा. तसेच अर्ज दाखल करतेवेळी तालुका स्तरीय लोकशाही दिनात अर्ज दाखल केल्याची पोच जिल्हास्तरीय लोकशाही दिनामध्ये सादर करावी. याशिवाय संबंधित अर्ज स्विकारले जाणार नाही, यांची नागरिकांनी नोंद घ्यावी, असे आवाहन निवासी उपजिल्हाधिकारी अनिरुध्द बक्षी यांनी केले आहे 0000000

अनुसूचित प्रवर्गातील शेतकऱ्यांना सामूहिक शेततळ्यासाठी दोन लाखांचे अनुदान

>शेतकऱ्यांनी योजनेचा लाभ घेण्याचे आवाहन यवतमाळ, दि. 30 (जिमाका) :दुष्काळी परिस्थितीच्या पार्श्वभूमीवर कृषी विभागामार्फत एकात्मिक फलोत्पादन विकास अभियानांतर्गत सन २०२६-२७ या वर्षासाठी रब्बी हंगामात जिल्ह्यात विविध योजना राबविण्यात येत आहेत. आधुनिक शेतीसाठी आवश्यक साधनसामग्री व सुविधा उभारण्यासाठी शेतकऱ्यांना या योजनेंतर्गत अर्थसहाय्य दिले जाणार आहे. त्यानुसार सामूहिक शेततळ्यासाठी एककानुसार जास्तीत जास्त दोन लाख रुपये, वैयक्तिक शेततळे अस्तरीकरणासाठी ७५ हजार रुपये अनुदान देण्यात येणार आहे. तसेच हरितगृह, शेडनेटगृह आणि तण नियंत्रणासाठी वापरण्यात येणाऱ्या वीड मॅटसाठी खर्चाच्या ५० टक्क्यांपर्यंत अनुदान मिळणार आहे. या घटकांसाठी कमाल क्षेत्रमर्यादा चार हजार चौरस मीटर आहे. मधुमक्षिका वसाहत व पेटीसाठी ४० टक्के अनुदान (जास्तीत जास्त ५० वसाहती), मध काढणी यंत्रासाठी ४० टक्के अनुदान, २० बीएचपी ट्रॅक्टरसाठी जास्तीत जास्त १.२५ लाख रुपये, तर आठ एचपीपेक्षा कमी क्षमतेच्या पॉवर टिलरसाठी ५० हजार ते दोन लाख रुपयांपर्यंत अर्थसाहय्य उपलब्ध आहे. तसेच नवीन बागांची स्थापना करण्यासा...

राष्ट्रीय कृषी विकास योजनेअंतर्गत शेततळे अस्तरीकरणासाठी ५० टक्के अनुदान

यवतमाळ, दि. 30 (जिमाका) : राष्ट्रीय कृषी विकास योजना व इतर विविध योजनांतर्गत खोदकाम पूर्ण झालेल्या वैयक्तिक शेततळ्यांच्या प्लास्टिक फिल्म अस्तरीकरणासाठी शासनाकडून ५० टक्के किंवा जास्तीत जास्त ७५ हजार रुपयांपर्यंत अनुदान देण्यात येणार आहे. दुष्काळी परिस्थितीवर मात करून फलोत्पादन पिके व फळबागांना संरक्षित सिंचनाची सुविधा उपलब्ध करून देणे तसेच पाण्याची नासाडी रोखणे हा या योजनेचा मुख्य उद्देश आहे. या योजनेचा लाभ घेण्यासाठी शेतकऱ्यांना ५०० मायक्रॉनची रीइनफोर्स्ड एचडीपीई जीओ मेंबरेन फिल्म वापरणे बंधनकारक आहे. इच्छुक शेतकऱ्यांनी ७/१२ उतारा, आधार कार्ड व बँक पासबुकसह https://mahadbt.maharashtra.gov.in/Farmer/AgriLogin/AgriLogin महाडीबीटी पोर्टल येथे अर्ज करावा किंवा अधिक माहितीसाठी जवळच्या कृषी कार्यालयाशी संपर्क साधावा, असे आवाहन जिल्हा अधीक्षक कृषी अधिकारी मनोजकुमार ढगे यांनी केले आहे. 000000

दुष्काळावर मात करण्यासाठी जलसंधारणाच्या कामांसह चारा लागवडीला प्राधान्य

Image
-पालकमंत्री संजय राठोड > पिण्याच्या पाण्यासाठी १० टक्के पाणीसाठा आरक्षित > रब्बी हंगामासाठी सिंचनाचे पाणी मिळणार नाही यवतमाळ, दि. 30 (जिमाका) : जिल्ह्यातील दुष्काळ परिस्थिती आणि आगामी काळातील पाणीटंचाईच्या पार्श्वभूमीवर पालकमंत्री संजय राठोड यांनी जिल्ह्यातील पाणी उपलब्धता, पीक परिस्थिती, मदत आणि दुष्काळ निवारणाच्या उपाययोजनांचा सविस्तर आढावा घेतला. यावेळी सिंचन प्रकल्पांतील उपलब्ध पाणीसाठ्यापैकी १० टक्के पाणी पिण्याच्या पाण्यासाठी आरक्षित ठेवण्यात आल्याची माहिती देण्यात आली. दुष्काळी परिस्थिती लक्षात घेता रब्बी हंगामासाठी सिंचनाचे पाणी उपलब्ध होणार नाही, याची शेतकऱ्यांना स्पष्ट कल्पना द्यावी. तसेच जलसंधारणाची कामे आणि चारा लागवडीच्या कामांना प्राधान्य द्यावे, असे निर्देश पालकमंत्र्यांनी दिले. जिल्हाधिकारी कार्यालयातील महसूल भवन येथे पालकमंत्री संजय राठोड यांच्या अध्यक्षतेखाली ही बैठक पार पडली. यावेळी जिल्हाधिकारी विकास मीना, जिल्हा परिषदेचे मुख्य कार्यकारी अधिकारी विशाल खत्री, उपवनसंरक्षक, अपर जिल्हाधिकारी सुदर्शन गायकवाड, निवासी उपजिल्हाधिकारी अनिरुद्ध बक्षी यांच्य...

माजी सरन्यायाधीश भूषण गवई यांचा जिल्हा दौरा

यवतमाळ, दि. 30 (जिमाका) : भारताचे माजी सरन्यायाधीश न्यायमूर्ती भूषण गवई हे शनिवार दि. ३१ ऑक्टोबर रोजी यवतमाळ जिल्ह्याच्या दौऱ्यावर येणार आहेत. त्यांच्या दौरा कार्यक्रमानुसार दुपारी १ वाजता पुसद जि. यवतमाळ येथे आगमन, दुपारी १.१५ वाजता पुसद येथे महाराष्ट्र आणि गोवा बार कौन्सिलचे सदस्य ॲड. आशिष देशमुख यांच्या निवासस्थानी सदिच्छा भेट, दुपारी २ वाजता पुसद येथे राज्यमंत्री इंद्रनिल नाईक यांच्या यांच्या निवासस्थानी सदिच्छा भेट, दुपारी ३ वाजता जिल्हा न्यायालय, पुसद येथे प्रस्तावित वकील भवनाच्या कोनशिला समारंभाला उपस्थिती, त्यानंतर ४.३० वाजता नागपूरकडे रवाना होतील. पोहरादेवीत नगारा भवन व बंजारा विरासतला भेट देणार माजी सरन्यायाधीश भूषण गवई हे शनिवारी सकाळी १०.३० वाजता पोहरादेवी येथील नगारा भवन व बंजारा विरासतला भेट देतील. यावेळी त्यांच्यासोबत मृद व जलसंधारण मंत्री तथा जिल्ह्याचे पालकमंत्री संजय राठोड हेही उपस्थित राहती

‘समृद्धीसाठी सत्यनिष्ठा’ संकल्पनेंतर्गत भ्रष्टाचाराविरुद्ध नागरिकांमध्ये जनजागृती

> २६ ऑक्टोबर ते १ नोव्हेंबरपर्यंत दक्षता जनजागृती सप्ताहाचे आयोजन यवतमाळ, दि. 28 (जिमाका) : केंद्र सरकारच्या केंद्रीय दक्षता आयोगाच्या वतीने दिनांक २६ ऑक्टोबर ते १ नोव्हेंबर २०२६ या कालावधीत दक्षता जनजागृती सप्ताह आयोजित करण्यात आला आहे. सरदार वल्लभभाई पटेल यांच्या जयंतीनिमित्त आयोजित या सप्ताहाचे यंदाचे घोषवाक्य समृद्धीसाठी सत्यनिष्ठा असे आहे. या अनुषंगाने लाचलुचपत प्रतिबंधक विभाग, यवतमाळ घटकाच्या वतीने नागरिकांना भ्रष्टाचाराविरोधात जागरूक राहण्याचे आवाहन करण्यात आले आहे. देशाच्या आर्थिक, राजकीय आणि सामाजिक प्रगतीमध्ये भ्रष्टाचार हा मोठा अडथळा ठरत आहे. भ्रष्टाचाराचे निर्मूलन करण्यासाठी शासन, नागरिक आणि खासगी क्षेत्रातील सर्व घटकांनी एकत्रितपणे प्रयत्न करणे आवश्यक आहे. प्रत्येक नागरिकाने जागरूक राहून प्रामाणिकपणा आणि सत्यनिष्ठेच्या मूल्यांचे पालन करावे, असे आवाहन पोलीस उपअधीक्षक अभय आष्टेकर यांनी केले आहे. लाचलुचपत प्रतिबंधक विभाग,जिल्ह्यात भ्रष्टाचाराविरोधात कार्यरत असून, शासकीय व निमशासकीय अधिकारी-कर्मचारी तसेच लोकप्रतिनिधी यांच्याकडून लाच मागणे, भ्रष्ट मार्गाने बेहिशेबी मालम...

विशेष लेख : दुष्काळ निवारण्यासाठी खारीचा वाटा उचलूया

दुष्काळ म्हणजे केवळ पाऊस कमी पडणे नव्हे. पाण्याची टंचाई, शेतीच्या उत्पन्नात घट, जनावरांच्या चाऱ्याचा प्रश्न, पशु पक्षांचा जगण्याचा प्रश्न, वाढता घरखर्च आणि रोजगाराच्या संधींवर होणारा परिणाम,असे त्याचे अनेक पैलू आहेत. मराठवाडा, विदर्भ आणि लगतच्या काही भागातील जनतेला दुष्काळाचे चटके वारंवार सहन करावे लागतात. अशा वेळी शासनाच्या मदतकार्याबरोबरच नागरिकांनीही उपलब्ध साधनसंपत्तीचा जपून वापर करणे आवश्यक आहे. जुन्या पिढीने अनुभवातून सांगितलेले एक वाक्य आजही महत्त्वाचे आहे, ‘दुष्काळ सगळ्यांना काटकसर शिकवतो!’ मात्र, ही काटकसर नेमकी कशी करावी, हे समजून घेणे अधिक महत्त्वाचे आहे. पाण्याचा अपव्यय टाळा, काटेकोर नियोजन करा. दुष्काळात प्रत्येक थेंब महत्त्वाचा असतो. पाण्याचे दुर्भिक्ष होऊ शकते हे आपल्या प्रत्येकाच्या लक्षात असले पाहिजे. आपण पाणी कमी वापरल्याने काय फरक पडणार हा प्रश्न पहिले मनातून काढून टाकणे आवश्यक आहे. घरातील गळणारे नळ त्वरित दुरुस्त करावेत. दात घासताना, ...

महर्षी वाल्मिकी जयंतीनिमित्त जिल्हाधिकारी कार्यालयात अभिवादन

Image
यवतमाळ, दि. 26 (जिमाका) : महर्षी वाल्मिकी यांच्या जयंतीनिमित्त निवासी उपजिल्हाधिकारी अनिरुद्ध बक्षी, यांनी महर्षी वाल्मिकी यांच्या प्रतिमेस पुष्पहार अर्पण करून अभिवादन केले. या प्रसंगी जिल्हाधिकारी कार्यालयातील सामान्य प्रशासनचे तहसिलदार अदित्य शेंडे,यांच्यासह अधिकारी व कर्मचाऱ्यांनी महर्षी वाल्मिकी यांच्या प्रतिमेस पुष्प अर्पण करून अभिवादन केले.

अमरावती विभाग शिक्षक मतदारसंघाच्या मतमोजणीसाठी यंत्रणा सज्ज

अधिकारी - कर्मचाऱ्यांनी मतमोजणी प्रक्रिया काळजीपूर्वक व अचूकपणे यशस्वी करावी - विभागीय आयुक्त नयना गुंडे अमरावती/ यवतमाळ दि. २६ - विधान परिषदेसाठी होणाऱ्या अमरावती विभाग शिक्षक मतदार संघांच्या निवडणुकीची मतमोजणी प्रक्रियेसाठी नियुक्त सर्व अधिकारी- कर्मचाऱ्यांनी काळजीपूर्वक,अचूक व शांततेत यशस्वी करावी,असे निर्देश निवडणूक निर्णय अधिकारी तथा विभागीय आयुक्त श्रीमती नयना गुंडे यांनी दिले. अमरावती विभाग शिक्षक मतदारसंघांची मतमोजणी मंगळवार २७ ऑक्टोबर २०२६ रोजी अमरावती येथील लोकशाही भवनात होणार आहे. या अनुषंगाने लोकशाही भवन येथील मतमोजणी कक्षात मतमोजणीसाठी नियुक्त अधिकारी व कर्मचाऱ्यांचे प्रशिक्षण आयोजित करण्यात आले. या प्रशिक्षणास निवडणूक निरीक्षक अभय महाजन, विभागातील पाचही जिल्ह्यांचे जिल्हाधिकारी तथा सहायक निवडणूक निर्णय अधिकारी यांच्यासह निवडणूक प्रक्रियेशी संबंधित नियुक्त सर्व अधिकारी व कर्मचारी उपस्थित होते. यावेळी श्रीमती गुंडे म्हणाल्या, मतमोजणीसाठी मतमोजणी केंद्र सज्ज करण्यात आले आहे. मतमोजणी अधिकारी- कर्मचाऱ्यांना सर्व सुविधा उपलब्ध करण्यात आल्या आहेत. ...

जिल्ह्याबाहेरील पशुधनाच्या चराईवर बंदी!

> जिल्हाधिकारी यांचे आदेश जारी यवतमाळ, दि. 26 (जिमाका) जिल्ह्यात निर्माण झालेली दुष्काळसदृश परिस्थिती आणि स्थानिक पशुधनासाठी उपलब्ध असलेल्या चाऱ्याचा मर्यादित साठा लक्षात घेता, जिल्ह्याच्या सीमाक्षेत्रात बाहेरील जिल्ह्यांतील तसेच इतर राज्यांतील पशुधन चराईसाठी आणण्यास प्रशासनाने संपूर्ण बंदी घातली आहे. जिल्हाधिकारी तथा जिल्हा आपत्ती व्यवस्थापन प्राधिकरणाचे अध्यक्ष विकास मीना यांनी आदेश जारी केले असून, हे आदेश २३ ऑक्टोबर पासून पुढील आदेश होईपर्यंत लागू राहणार आहेत. दुष्काळसदृश परिस्थितीमुळे निर्णय सन २०२६ च्या खरीप हंगामात ट्रिगर-१ (प्रथम कळ) लागू झालेल्या राज्यातील २६५ तालुक्यांमध्ये जिल्ह्यातील सर्व १६ तालुक्यांचा समावेश आहे. जिल्ह्यात दुष्काळ जाहीर करून विविध उपाययोजना आणि सवलती लागू करण्याबाबत शासनाने निर्णय घेतला आहे. सध्या दुष्काळसदृश परिस्थिती झाली असून जिल्ह्यात एकूण ८ लाख १८ हजार १३८ पशुधन आहे. खरीप पेरा आणि पशुसंवर्धन विभागाकडून होणारे वैरण वाटपापासून मिळणारा चारा पाहता, जिल्ह्यातील स्थानिक पशुधनासाठी १५ एप्रिल २०२७ पर्यंतच पुरण्याची शक्यता आहे. जिल्ह्याबाहेरी...

अमरावती विभाग शिक्षक मतदारसंघाच्या निवडणूकीत अंदाजे ९१.०८ टक्के मतदान

Image
अमरावती दि.२३ - विधान परिषदेच्या अमरावती विभाग शिक्षक मतदारसंघाच्या निवडणूकीसाठी आज अमरावती विभागातील पाचही जिल्ह्यांतील ८१ मतदान केंद्रांवर शांततेत व निर्भय वातावरणात मतदान प्रक्रिया पार पडली. यावेळी जवळपास ९१.०८ टक्के मतदारांनी आपला मतदानाचा हक्क बजावला असल्याची माहिती निवडणूक निर्णय अधिकारी तथा विभागीय आयुक्त श्रीमती नयना गुंडे यांनी दिली. आज सकाळी ८ वाजता सर्व मतदान केंद्रावर शांततेत मतदानास सुरूवात झाली. मतदानासाठी विभागातील पाच जिल्ह्यांत ८१ मतदान केंद्र स्थापन करण्यात आली होती. सकाळी ८ ते दुपारी ४ पर्यंत मतदानासाठी वेळ देण्यात आली होती. अमरावती विभाग शिक्षक मतदारसंघाच्या निवडणुकीसाठी एकुण मतदारांची संख्या ३५ हजार ८१० असून त्यापैकी ३२ हजार ६१६ मतदारांनी मतदान केले आहे. जिल्हानिहाय एकुण मतदानाची माहिती अनुक्रमे पुढील प्रमाणे आहे. अमरावती - १०,०९७ पैकी ९०२३ (८९.३६ टक्के), अकोला - ५,९४२ पैकी ५४७४ (९२.१२ टक्के), बुलढाणा - ९,१२४ पैकी ८२८० (९०.७५ टक्के), वाशिम - ३,७१५ पैकी ३४५० (९२.८७ टक्के) आणि यवतमाळ - ६,९३२ पैकी ६३८९ (९२.१७ टक्के) मतदारांनी म्हणजे एकूण जवळपास ९१.०८ टक्के मतदारांन...

अमरावती विभाग शिक्षक मतदारसंघ निवडणुकीसाठी यवतमाळ जिल्ह्यात 92.17 टक्के मतदान

Image
> 18 मतदान केंद्रांवर मतदान प्रक्रिया सुरळीत ; मतदारांचा उत्स्फूर्त प्रतिसाद यवतमाळ, दि. 23 : अमरावती विभाग शिक्षक मतदारसंघ निवडणूक 2026 अंतर्गत यवतमाळ जिल्ह्यातील 18 मतदान केंद्रांवर मतदान प्रक्रिया सुरळीतपणे पार पडली. मतदानासाठी मतदारांमध्ये उत्साह दिसून आला. विविध मतदान केंद्रांवर मतदारांची गर्दी पाहायला मिळाली. यवतमाळ जिल्ह्यात एकूण 6932 मतदारांची नोंद होती. त्यापैकी 6389 मतदारांनी मतदानाचा हक्क बजावला. यामध्ये 4560 पुरुष व 1829 महिला मतदारांनी मतदान केले. सकाळी 8 वाजता सुरु झालेले मतदान दुपारी 4 वाजेपर्यंत घेण्यात आले. काही ठिकाणी मतदारांच्या रांगा लागल्यामुळे उशिरापर्यंत मतदान घेण्यात आले. मतदान प्रक्रिया संपल्यानंतर यवतमाळ जिल्ह्यात एकूण मतदानाची टक्केवारी 92.17 इतकी नोंदविण्यात आली. पुरुषांपेक्षा महिलांची मतदानात आघाडी मतदार यादीनुसार, यवतमाळ जिल्ह्यात 6932 मतदारांपैकी 4963 पुरुष व 1969 स्त्री मतदार होते. या निवडणुकीच्या मतदान प्रक्रियेत 4560 पुरुष मतदारांचे 91.88 टक्के मतदान झाले. तर 1829 महिला मतदारांनी 92.89 टक्के मतदान करुन मतदान प्रक्रियेत आघाडी घेतली. संपूर्ण म...

दुष्काळग्रस्त भागातील विद्यार्थ्यांना परीक्षा शुल्कातून सूट विद्यार्थ्यांकडून परीक्षा शुल्क घेऊ नये; यापूर्वी घेतलेले शुल्क परत करण्याचे निर्देश

Image
यवतमाळ, दि. 23 (जिमाका) : राज्य शासनाने दुष्काळ जाहीर झालेल्या तालुक्यांतील विद्यार्थ्यांना परीक्षा शुल्कातून सवलत देण्याचा निर्णय घेतला आहे. या अनुषंगाने जिल्हा परिषद, यवतमाळच्या शिक्षणाधिकारी (माध्यमिक) यांनी जिल्ह्यातील सर्व अनुदानित व विनाअनुदानित शाळांच्या प्राचार्य आणि मुख्याध्यापकांना विद्यार्थ्यांकडून परीक्षा शुल्क आकारू नये, असे निर्देश दिले आहेत. राज्य शासनाच्या मदत व पुनर्वसन विभागाच्या शासन निर्णयाच्या अनुषंगाने तसेच जिल्हाधिकारी यांच्या निर्देशानुसार ही कार्यवाही करण्यात येत आहे. राज्य मंडळाच्या दहावी, बारावी तसेच काेणत्याही परीक्षांसाठी विद्यार्थ्यांकडून परीक्षा शुल्क आकारू नये, असे स्पष्ट निर्देश देण्यात आले आहेत. यापूर्वी विद्यार्थ्यांकडून परीक्षा शुल्क घेण्यात आले असल्यास ते संबंधित विद्यार्थ्यांना परत करावे, असेही सूचित करण्यात आले आहे. परीक्षा शुल्क भरले नाही, या कारणामुळे एकही विद्यार्थी परीक्षेपासून वंचित राहणार नाही, याची दक्षता सर्व प्राचार्य व मुख्याध्यापकांनी घ्यावी, असे आवाहन शिक्षणाधिकारी (माध्यमिक), जिल्हा परिषद, यवतमाळ यांनी केले आहे. दुष्काळाच्या परिस्थि...

‘नशामुक्त युवा, सशक्त भारत’थीमवर जिल्हास्तरीय युवा महोत्सव

>अमोलकचंद महाविद्यालयात ३ नोव्हेंबरला आयोजन यवतमाळ, दि. 23 (जिमाका) : जिल्हा क्रीडा अधिकारी कार्यालय, आणि माय भारत युवा कार्यक्रम व क्रीडा मंत्रालय, भारत सरकार यांच्या संयुक्त विद्यमाने जिल्हास्तरीय युवा महोत्सव २०२६ चे आयोजन मंगळवार, दि. ३ नोव्हेंबर रोजी अमोलकचंद महाविद्यालय, यवतमाळ येथे करण्यात आले आहे. यंदाच्या महोत्सवाची मध्यवर्ती संकल्पना ‘नशामुक्त युवा, सशक्त भारत’ अशी असून, युवकांच्या कलागुणांना वाव देण्यासोबतच त्यांच्यात नेतृत्वगुण, सर्जनशीलता आणि सामाजिक जाणीव विकसित करण्याचा या महोत्सवाचा उद्देश आहे. हा महोत्सव केंद्र शासनाच्या विकसित भारत यंग लीडर्स डायलॉग २०२७ या महत्त्वाकांक्षी उपक्रमाचा पहिला टप्पा आहे. विकसित भारताचे ध्येय साध्य करण्यासाठी युवकांचे शारीरिक व मानसिक आरोग्य सुदृढ असणे आवश्यक आहे. युवकांनी अमली पदार्थांसह विविध घातक व्यसनांपासून दूर राहावे, व्यसनांच्या दुष्परिणामांविषयी जागरूक व्हावे आणि नशामुक्त जीवनशैलीचा स्वीकार करावा, हा या संकल्पनेमागील प्रमुख हेतू आहे. विविध कला प्रकारांत होणार स्पर्धा या युवा महोत्सवामध्ये समूह लोकनृत्य, समूह लोकगीत, चित्रकला, क...

आदिवासी मुलामुलींच्या वसतिगृहासाठी भाडेतत्वावर इमारतीची आवश्यकता

यवतमाळ, दि. 23 (जिमाका) : उमरखेड येथील आदिवासी मुलामुलींच्या शासकीय वसतिगृहासाठी उमरखेड शहरात सर्व सोयीसुविधांनीयुक्त इमारत भाड्याने घेण्यात येणार असून, इच्छुक इमारत मालकांनी वसतिगृहाच्या गृहपालांशी संपर्क साधावा, असे आवाहन करण्यात आले आहे. इमारतीत मुलांसाठी ३००० चौ. फूट व मुलींसाठी ३००० चौ. फूट बांधलेल्या खोल्या, कार्यालयाकरिता स्वतंत्र खंली, स्वयंपाकगृह, कोठीगृह, डायनिंग हॉल व वाचनालयासाठी स्वतंत्र रुम, किमान ४ स्नानगृहे व ४ शौचालये, मुबलक पाणीपुरवठा तसेच शक्य असल्यास क्रीडांगण असणे आवश्यक आहे. इमारत भाड्याने देण्यास इच्छुकांनी संमतीपत्र व प्रस्ताव सादर करण्याचे आवाहन गृहपाल यांनी केले आहे. तसेच अधिक माहितीसाठी ९५१८९२७९२० / ९६८९४१४२४० / 8928907817 या क्रमांकांवर संपर्क साधावा, असे आवाहन करण्यात आले आहे.

रब्बी ज्वारीच्या अधिक उत्पादनासाठी आधुनिक तंत्रज्ञानाचा अवलंब करा

 जिल्हा अधीक्षक कृषी अधिकारी यांचे शेतकऱ्यांना आवाहन यवतमाळ, दि. 23 (जिमाका) : रब्बी हंगामात ज्वारीचे अधिक उत्पादन आणि दर्जेदार धान्य मिळविण्यासाठी शेतकरी बांधवांनी सुधारित वाणांची निवड, वेळेवर पेरणी, खत व पाणी व्यवस्थापन आणि योग्य आंतरमशागतीवर भर द्यावा, असे आवाहन जिल्हा अधीक्षक कृषी अधिकारी, यांनी केले आहे. कमी पाण्यात आणि कमी खर्चात अधिक उत्पादन मिळविण्यासाठी रब्बी ज्वारीच्या सुधारित लागवड तंत्रज्ञानाचा अवलंब करणे आवश्यक असल्याचे कृषी विभागाने केले आहे. योग्य जमीन व पूर्वमशागत महत्त्वाची रब्बी ज्वारीच्या लागवडीसाठी मध्यम ते खोल, भारी, अधिक जलधारण क्षमता असलेली आणि पाण्याचा चांगला निचरा होणारी जमीन निवडावी. खरीप हंगामातील उडीद किंवा मूग काढल्यानंतर वखराच्या तीन ते चार खोल पाळ्या देऊन जमिनीची पूर्वमशागत करावी. पेरणीपूर्वी हेक्टरी १० ते १५ गाड्या चांगले कुजलेले शेणखत किंवा कंपोस्ट खत जमिनीत मिसळावे. वेळेवर पेरणी, प्रमाणित बियाण्यांचा वापर रब्बी ज्वारीची पेरणी २५ सप्टेंबर ते १५ ऑक्टोबर या कालावधीत पूर्ण करावी. पेरणीला उशीर झाल्यास खोडमाशीचा प्रादुर्भाव वाढण्याची शक्यता असते. हेक्टरी ७...

पीडीकेव्ही स्मार्ट मॉडेल व्हिलेज रोडमॅपनुसार गावाचा सर्वांगीण विकास शक्य

Image
> कुलगुरू डॉ. शरद गडाख यांचे प्रतिपादन > लासिना व यावली येथे क्षेत्रीय भेट आणि मार्गदर्शन यवतमाळ, दि. 23 (जिमाका) : डॉ. पंजाबराव देशमुख कृषी विद्यापीठ, अकोला यांच्या ‘पीडीकेव्ही स्मार्ट मॉडेल व्हिलेज’ या महत्त्वाकांक्षी उपक्रमांतर्गत शेतीशी संलग्न सर्व शासकीय व निमशासकीय संस्थांनी समन्वयाने आणि विद्यापीठाच्या चार सूत्रांनुसार काम केल्यास तीन वर्षांत गावाचा सर्वांगीण विकास साधता येऊ शकतो, असे प्रतिपादन विद्यापीठाचे कुलगुरू डॉ. शरद गडाख यांनी केले. कृषी विज्ञान केंद्र, यवतमाळ-१ यांच्या वतीने १७ ऑक्टोबर रोजी लासिना आणि यावली येथे आयोजित क्षेत्रीय भेट व मार्गदर्शन कार्यक्रमात ते बोलत होते. या उपक्रमात कृषी विज्ञान केंद्राने प्रमुख समन्वयकाची भूमिका बजावून कृषी व संलग्न विभागांच्या सहकार्याने गावाच्या विकासाचे नियोजन करावे, असे आवाहन कुलगुरू डॉ. गडाख यांनी केले. विद्यापीठाच्या शिफारशीनुसार आधुनिक कृषी तंत्रज्ञानाचा अवलंब, उत्पादन खर्चात कपात, शेतमालाचे मूल्यवर्धन आणि शेतीपूरक व्यवसायांचा विस्तार या माध्यमातून शेतकऱ्यांचे उत्पन्न वाढविणे हे या उपक्रमाचे प्रमुख उद्दिष्ट आहे. विद्यापी...

दुष्काळी परिस्थितीवर मात करण्यासाठी राळेगाव, कळंबमध्ये विशेष जलसंधारण व जनजागृती मोहीम

Image
> प्रत्येक ग्रामपंचायतीत लोकसहभागातून किमान पाच वनराई बंधारे उभारणार यवतमाळ, दि. 23 (जिमाका) : पाणीटंचाई व संभाव्य दुष्काळजन्य परिस्थितीवर मात करण्यासाठी राळेगाव व कळंब तालुक्यांत २१ ते २८ ऑक्टोबर २०२६ या कालावधीत ‘विशेष जलसंधारण व जनजागृती सप्ताह’ ही मोहीम राबविण्यात येत आहे. भूजल पातळीत होत असलेली घट, पिण्याच्या पाण्याचे संभाव्य दुर्भिक्ष आणि जनावरांच्या चाऱ्याची टंचाई लक्षात घेऊन प्रशासनाने हा निर्णय घेतला आहे. या मोहिमेंतर्गत प्रत्येक ग्रामपंचायतीमध्ये नदी, नाले व ओढ्यांवर लोकसहभागातून किमान पाच वनराई बंधारे उभारण्यात येणार आहेत. पावसाळा संपल्याने स्थानिक नाले व ओढ्यांमधील नैसर्गिक पाण्याचा प्रवाह कमी होण्याची शक्यता आहे. त्यामुळे आगामी काळातील पाणीटंचाई व इतर संभाव्य आव्हानांना तोंड देण्यासाठी मृद व जलसंधारणाच्या विविध उपाययोजना करण्यात येणार आहेत. तसेच पाणी, चारा व इतर संसाधनांची बचत करून त्यांचा काटकसरीने वापर करण्याबाबत नागरिकांमध्ये जनजागृती केली जाणार आहे. या सप्ताहाची सुरुवात २१ ऑक्टोबर रोजी मौजा रामतीर्थ, ता. राळेगाव येथे रामगंगा नदीवर वनराई बंधारा उभारून करण्यात आली...

कृषी विज्ञान केंद्र यवतमाळतर्फे ‘खेत बचाव अभियान’चा असोला येथे शुभारंभ

Image
यवतमाळ, दि. 22 (जिमाका) : शेतीचा शाश्वत विकास साधण्यासाठी माती परीक्षणावर आधारित खतांचा संतुलित वापर, पीक विविधीकरण, पीक अवशेषांचे योग्य व्यवस्थापन, सेंद्रिय व नैसर्गिक उत्पादनांचा वापर तसेच जलसंधारण आणि पाण्याचे पुनर्भरण याबाबत शेतकऱ्यांमध्ये जनजागृती करणे आवश्यक आहे, असे प्रतिपादन डॉ. रुपेश झाडोदे, शास्त्रज्ञ (कृषिविद्या), कृषी विज्ञान केंद्र, यवतमाळ यांनी केले. केंद्र शासनाच्या वतीने दि. २२ ऑक्टोबर ते ३० नोव्हेंबर या कालावधीत खेत बचाव अभियान राबविण्यात येत आहे. या अभियानाच्या अनुषंगाने डॉ. पंजाबराव देशमुख कृषी विद्यापीठ, अकोला अंतर्गत कृषी विज्ञान केंद्र, यवतमाळ-१, कृषी विभाग आणि आत्मा यांच्या संयुक्त विद्यमाने गुरुवार, दि. २२ ऑक्टोबर रोजी यवतमाळ तालुक्यातील असोला येथे या अभियानाचा शुभारंभ करण्यात आला. या कार्यक्रमाला वरिष्ठ शास्त्रज्ञ तथा प्रमुख, कृषी विज्ञान केंद्र, डॉ. दीपक कच्छवे, उपकृषी अधिकारी, कृषी विभाग गजानन गावंडे, शास्त्रज्ञ (कृषिविद्या), कृषी विज्ञान केंद्र, डॉ. रुपेश झाडोदे, सरपंच, असोलाचे रशीलाताई जयस्वाल, पोलीस पाटील,वंदनाताई होले, सहाय्यक तंत्रज्ञान व्यवस्थापक...

महाकृषी संवाद आता अधिक सुलभ ! ‘वसुधा व्हॉइस बॉट’ द्वारे जनजागृती मोहीम

> पोकराच्या महाविस्तार एआय अंतर्गत सुविधा > टोल-फ्री क्रमांक १५५३१३ यवतमाळ, दि. 22 (जिमाका) शेतकऱ्यांना शेतीविषयक अचूक माहिती, हवामान अंदाज, पिकांवरील किडींचे व्यवस्थापन आणि कृषी योजनांची माहिती घरबसल्या सोप्या भाषेत उपलब्ध करून देण्यासाठी महाराष्ट्र शासनाच्या कृषी विभागांतर्गत नानाजी देशमुख कृषी संजीवनी प्रकल्पाद्वारे (पोकरा) विकसित करण्यात आलेल्या ‘महाविस्तार-AI’ प्रणालीतील ‘वसुधा’ व्हॉइस बॉटच्या जनजागृती मोहिमेला जिल्ह्यात सुरुवात झाली आहे. या प्रणालीतील टोल-फ्री क्रमांक १५५३१३ ची कार्यक्षमता व प्रतिसादक्षमता वाढविण्यासह ही सुविधा जास्तीत जास्त शेतकऱ्यांपर्यंत पोहोचविण्यासाठी विशेष प्रचार-प्रसिद्धी मोहीम हाती घेण्यात आली आहे. शेतकरी या व्हॉइस बॉटच्या माध्यमातून शेतीविषयक शंका, पिकांवरील किडींचे व्यवस्थापन, हवामान अंदाज आणि शासनाच्या विविध कृषी योजनांबाबत माहिती मिळवू शकतात. जिल्ह्यातील जास्तीत जास्त शेतकऱ्यांनी ‘वसुधा’ व्हॉइस बॉटच्या १५५३१३ या टोल-फ्री क्रमांकावर संपर्क साधून या सुविधेचा लाभ घ्यावा, असे आवाहन जिल्हा अधीक्षक कृषी अधिकारी मनोजकुमार ढगे यांनी केले आहे.

दुष्काळी परिस्थितीत दिलासा! जिल्ह्यात अन्नधान्याचा पुरेसा साठा

यवतमाळ, दि. 22 (जिमाका) : जिल्ह्यात दुष्काळी परिस्थितीच्या पार्श्वभूमीवर नागरिकांना अन्नधान्याची टंचाई भासू नये, यासाठी जिल्हा पुरवठा विभागाकडून धान्य वितरणाचे नियोजन करण्यात आले आहे. जिल्ह्यातील एकूण 2044 रास्त भाव दुकानांमधून लाभार्थ्यांना धान्य वितरित केले जात असून, ऑक्टोबर महिन्याचे धान्य सर्व दुकानांमध्ये पोहोचले असून सुरळीत वितरण सुरु आहे. दुष्काळाच्या परिस्थितीत सर्वसामान्य कुटुंबांना अन्नधान्य उपलब्ध होणे महत्त्वाचे असल्याने सार्वजनिक वितरण व्यवस्थेच्या माध्यमातून धान्य पुरवठा सुरळीत ठेवण्यावर प्रशासनाने भर दिला आहे. नोव्हेंबर 2026 महिन्यासाठी जिल्ह्याला गहू 40,600 क्विंटल, तांदूळ 50,910 क्विंटल आणि ज्वारी 16,238 क्विंटल इतके धान्य नियतन मंजूर करण्यात आले आहे. या धान्याची उचल सुरू असल्याचे जिल्हा पुरवठा अधिकारी संघपाल मेश्राम माहितीत नमूद आहे. दरम्यान, 12 ऑक्टोबर रोजीच्या आकडेवारीनुसार गोदामांमध्ये गहू 35,257 क्विंटल, तांदूळ 40,936 क्विंटल आणि ज्वारी 16,997 क्विंटल इतका धान्यसाठा प्रत्यक्षात शिल्लक होता. दुष्काळी परिस्थितीत ग्रामीण भागातील तसेच गरजू कुटुंबांना धान्य मिळण्य...

जिल्ह्यात विशेष आर्थिक समावेशन मोहीम

> लाभार्थ्यांची नोंदणी, आधार लिंकसह डिजिटल बँकींगचा सुरक्षित वापराविषयी जनजागृती > प्रत्येक गावात बँकिंग शिबिरांचे आयोजन यवतमाळ, दि. 21 (जिमाका) : शासनाच्या वित्तीय सेवा विभागाच्या निर्देशानुसार जिल्ह्यात ३१ डिसेंबरपर्यंत विशेष आर्थिक समावेशन मोहीम राबविण्यात येणार आहे. जिल्ह्यातील प्रत्येक पात्र नागरिकाला बँकिंग सेवांशी जोडणे, शासकीय विमा व पेन्शन योजनांचा लाभ मिळवून देणे आणि आर्थिक समावेशनाची व्याप्ती वाढविणे हा या मोहिमेचा मुख्य उद्देश आहे. जिल्हा प्रशासन, जिल्हा अग्रणी बँक आणि जिल्ह्यातील सर्व बँकांच्या समन्वयातून ही मोहीम राबविण्यात येणार आहे. या मोहिमेदरम्यान प्रधानमंत्री जीवनज्योती विमा योजना, प्रधानमंत्री सुरक्षा विमा योजना आणि अटल पेन्शन योजना यांमध्ये पात्र लाभार्थ्यांची नोंदणी करण्यावर विशेष भर दिला जाणार आहे. तसेच या योजनांच्या लाभार्थ्यांच्या बँक खात्यांना आधार जोडण्याची कार्यवाही केली जाणार आहे. प्रधानमंत्री जनधन योजनेअंतर्गत नवीन बँक खाती उघडणे, विशेषतः असुरक्षित आदिवासी समुदायातील कुटुंबांना बँकिंग सुविधांशी जोडणे आणि निष्क्रिय झालेली बँक खाती पुन्हा कार्यरत...

अनुसूचित जमातीच्या वैधता प्रमाणपत्र पडताळणीचे प्रस्ताव ३० नोव्हेंबरपर्यंत सादर करण्याचे आवाहन

यवतमाळ, दि. 21 (जिमाका) अनुसूचित जमातीच्या इयत्ता ११ वी व १२ वीमध्ये शिक्षण घेत असलेल्या आणि पुढे व्यावसायिक अभ्यासक्रमासाठी प्रवेश घेऊ इच्छिणाऱ्या विद्यार्थ्यांनी त्यांचे अनुसूचित जमातीच्या प्रमाणपत्र पडताळणीचे प्रस्ताव https://etribevalidity.trti-maha.in या संकेतस्थळावर ३० नोव्हेंबरपर्यंत ऑनलाइन सादर करावेत, असे आवाहन करण्यात आले आहे. वैधता प्रमाणपत्रासाठी अचूक ऑनलाइन अर्ज, ई-मेल आयडी, मोबाईल क्रमांक नमूद करून आवश्यक कागदपत्रे अपलोड करावीत व परिपूर्ण प्रस्ताव समिती कार्यालयात सादर करावा. व्यावसायिक अभ्यासक्रमासाठी प्रवेश घेऊ इच्छिणाऱ्या विद्यार्थ्यांचे प्रस्ताव मुदतीत सादर करण्यासाठी संबंधित शाळा व महाविद्यालयांनी १० डिसेंबर २०१९ च्या शासन निर्णयाचे पालन करावे, असे आवाहन अनुसूचित जमाती प्रमाणपत्र तपासणी समितीचे सहआयुक्त तथा उपाध्यक्ष मनोज चव्हाण यांनी केले आहे.

दिवाळीनिमित्त विशेष रात्रकालीन पार्सल बुकिंग सुविधा

Image
> मुख्य टपाल घर परिसरात यवतमाळ सॉर्टिंग काउंटर सुरू यवतमाळ, दि. 21 (जिमाका) : दिवाळी सणानिमित्त नागरिकांच्या सोयीसाठी मुख्य टपाल घर परिसरातील यवतमाळ सॉर्टिंग काउंटरवर देशांतर्गत आणि आंतरराष्ट्रीय पार्सल बुकिंगसाठी विशेष सुविधा सुरू करण्यात आली आहे. हे काउंटर दुपारी ३ ते रात्री ९ वाजेपर्यंत सुरू राहणार आहे. या काउंटरवर स्पीड पोस्ट, देशांतर्गत पार्सल, आंतरराष्ट्रीय पत्रे, पार्सल आणि ईएमएस सेवा उपलब्ध राहणार आहेत. दिवाळीनिमित्त नातेवाईकांना भेटवस्तू, मिठाई व फराळ पाठविण्यासाठी नागरिकांनी या विस्तारित सुविधेचा लाभ घ्यावा, असे आवाहन रेल्वे डाक सेवा, यवतमाळचे अधीक्षक गणेश बा. आंभोरे यांनी केले आहे. परदेशात पार्सल पाठविताना संबंधित देशाचे आयात नियम व सीमाशुल्क नियमांची माहिती काउंटरवरून घ्यावी. खाद्यपदार्थ पाठविण्यापूर्वी त्यांचे योग्य पॅकिंग व सुरक्षित सीलिंग करावे, तसेच संबंधित देशात त्या पदार्थांच्या आयातीस परवानगी आहे का, याची खात्री करावी. दिवाळीच्या काळात देशांतर्गत व आंतरराष्ट्रीय पार्सल पाठविण्यासाठी टपाल विभागाच्या या विशेष सुविधेचा नागरिकांनी लाभ घ्यावा, असे आवाहन रेल्...

सरकारी दवाखान्यात नौकरी लावून देतो म्हणाऱ्यांच्या आमिषाला बळी पडू नका

> अधिष्ठाता यांचे नागरिकांना आवाहन > शासकीय वैद्यकीय महाविद्यालयात कंत्राटी भरती > आर्थिक व्यवहार टाळा यवतमाळ, दि. 19 (जिमाका) : श्री. वसंतराव नाईक शासकीय वैद्यकीय महाविद्यालय व रुग्णालय, यवतमाळ येथील वर्ग-३ मधील तांत्रिक व अतांत्रिक तसेच वर्ग-४ संवर्गातील नियमित पदे भरेपर्यंत सदर पदे निव्वळ तात्पुरत्या स्वरूपात बाह्यस्रोतांमार्फत भरण्यासाठी शासनाने मे स्मार्ट प्रा. लि., पुणे या कंपनीशी करार केला आहे. सदर पदभरतीची प्रक्रिया संबंधित कंपनीमार्फत राबविण्यात येत आहे. या कंत्राटी पदभरतीमध्ये नियुक्ती करून देण्याच्या आमिषाने मोठ्या प्रमाणात आर्थिक व्यवहाराची मागणी केली जात असल्याबाबतच्या अफवा पसरत आहेत. या पार्श्वभूमीवर श्री. वसंतराव नाईक शासकीय वैद्यकीय महाविद्यालय व रुग्णालय प्रशासनाने सर्वसामान्य नागरिकांना सावध राहण्याचे आवाहन केले आहे. सदर कंत्राटी पदभरतीची प्रक्रिया मे स्मार्ट प्रा. लि., पुणे या खाजगी कंपनीमार्फत राबविण्यात येत असून, या पदभरतीच्या अनुषंगाने कोणत्याही व्यक्तीने नोकरी लावून देण्याचे आमिष दाखवून पैशांची मागणी केल्यास अशा आमिषांना बळी पडू नये. तसेच कोणत्याही प्...

जिल्ह्यात आता मोबाईल अॅपद्वारे खत वितरण

> कृषी विभागाचा पथदर्शी प्रकल्प > २२ ऑक्टोबरपासून ऑनलाइन खत विक्रीला सुरुवात यवतमाळ, दि. 19 (जिमाका) जिल्ह्यामध्ये २२ ऑक्टोबरपासून मोबाईल अॅपद्वारे खतांची नोंदणी व खरेदी करता येणार आहे. खत वितरण प्रणालीच्या ‘फ्रेमवर्क फॉर फर्टीलाझर सेल’ या पथदर्शी प्रकल्पाच्या अंमलबजावणीसाठी यवतमाळ जिल्ह्याची निवड करण्यात आली आहे. आगामी २२ ऑक्टोबरपासून हा प्रकल्प जिल्ह्यात सुरू होणार असून या प्रणालीचा जिल्ह्यातील जास्तीत जास्त शेतकऱ्यांनी लाभ घ्यावा, असे आवाहन जिल्हाधिकारी विकास मीना यांनी केले आहे. या प्रकल्पासंदर्भात जिल्हाधिकाऱ्यांनी यांनी जिल्ह्यात ‘फ्रेमवर्क फॉर फर्टीलाझर सेल’ या पथदर्शी प्रकल्पाची प्रभावी अंमलबजावणी करण्यासाठी सर्व तहसीलदार, गटविकास अधिकारी, तालुका कृषी अधिकारी आणि सहाय्यक निबंधक यांनी परस्पर समन्वयाने कार्यवाही करावी, असे निर्देश अधिकारी व कर्मचाऱ्यांना दिले आहेत. तालुक्यातील सर्व कृषी सहाय्यक, ग्राम महसूल अधिकारी, ग्रामपंचायत अधिकारी, कृषिमित्र, कृषिसखी, कृषी तंत्रज्ञान व्यवस्थापक आणि सहाय्यक कृषी तंत्रज्ञान व्यवस्थापक यांच्यासाठी विशेष प्रशिक्षण आयोजित करावे. या प्रश...