यवतमाळ तालुक्यात कृषी अवजारे बँक स्थापनेसाठी 5 एप्रिलपर्यंत ऑनलाईन अर्ज करावे

तालुका कृषी अधिकारी पी. एम. गवई यांचे आवाहन यवतमाळ, दि. 17 (जिमाका) : जागतिक बँकेच्या सहाय्याने राज्यात नानाजी देशमुख कृषि संजीवनी प्रकल्प राबविण्यात येत आहे. या प्रकल्पांतर्गत यवतमाळ तालुक्यात गावस्तरावर कृषी अवजारे बँक स्थापन करण्यासाठी महिला शेतकरी गटांनी 5 एप्रिलपर्यंत ऑनलाईन अर्ज करावेत, असे आवाहन तालुका कृषी अधिकारी पी. एम. गवई यांनी केले आहे. या प्रकल्पांतर्गत ‘एक गाव, एक कृषि अवजारे बँक’ या तत्वानुसार प्रकल्प गावातील नोंदणीकृत महिला शेतकरी गटांमार्फत गावस्तरावरील कृषि अवजारे बँक स्थापन करुन भाडेतत्वावर यंत्रसामग्री उपलब्ध करून देण्यात येणार आहे. त्यासाठी प्रकल्प गावातील उमेद व माविम पुरस्कृत महिला बचत गट तसेच महिला गाव संघ पात्र राहणार आहेत. कृषि यांत्रिकीकरणाला चालना देण्यासाठी गावस्तरावरील नोंदणीकृत महिला बचत गटांना एफपीओ-डिबीटीच्या https://dbt-ndksp.mahapocra.gov.in/ या पोर्टलवर ऑनलाईन अर्ज करणे आवश्यक आहे. याबाबत अधिक माहितीसाठी एफपीओ-डिबीटी पोर्टलला भेट द्यावी. यवतमाळ तालुका अंतर्गत 28 गावांची नानाजी देशमुख कृषि संजीवनी प्रकल्पांतर्गत निवड झालेली आहे. यात आसोला, पांढुर्णा, पिंपरी, वाई, आनंद नगर, हातोला जांभुळणी, टेंभुर्णी, कापरा (मेथड), किटा, टेकडी, लासीना, पिंपरी (आई), वाघपूर, चिंचबर्डी, पारवा, भारी, तळेगाव, वाकी, शिवनी बु, खानगाव, जामडोह, घोडदरा, चिंचघाट, वडनेर, रामवाकडी, धरमगाव, सायखेडा खु, गावे असे एकुण 28 गावांची निवड झाली असुन गावस्तरावरील कृषि अवजारे बँक या घटकासाठी प्रकल्पाच्या एफपीओ-डिबीटी पोर्टलवर ऑनलाईन अर्ज प्रक्रिया सुरु करण्यात आली आहे. अर्ज स्वीकारण्याची अंतिम दि. 5 एप्रिल पर्यंत असून या घटकासाठी एका गावातून एकापेक्षा जास्त गटांचे अर्ज प्राप्त झाल्यास, अर्जाची निवड प्रक्रिया ऑनलाईन लॉटरी पध्दतीने करण्यात येईल, असे आवाहन तालुका कृषि अधिकारी पी.एम.गवई यांनी केले आहे.