हॉटेल, बार-रेस्टॉरंटमध्ये अवैधरित्या घरगुती गॅस सिलेंडर वापराविरुद्ध धडक कारवाई; १३ सिलेंडर जप्त

यवतमाळ, दि.१८ (जिमाका) : जिल्ह्यातील हॉटेल, भोजनालय तसेच बार-रेस्टॉरंटमध्ये घरगुती गॅस सिलेंडरचा अवैधरित्या वापर करणाऱ्यांविरुद्ध प्रशासनाने कठोर भूमिका घेतली असून भरारी पथकांकडून धडक कारवाई सुरू करण्यात आली आहे. या कारवाईत महागांव, हिवरा, धनोडा, गुंज आदी ठिकाणांसह विविध हॉटेल व रेस्टॉरंटमधून एकूण १३ भरलेले घरगुती गॅस सिलेंडर जप्त करण्यात आले. ही कारवाई जिल्हाधिकारी विकास मीना यांच्या निर्देशानुसार आणि जिल्हा पुरवठा अधिकारी यांच्या मार्गदर्शनाखाली करण्यात आली. या पथकातील परिवक्षाधीन तहसीलदार रोहित शिंदे, पुरवठा निरीक्षण अधिकारी मोहन कोल्हे, नायब तहसीलदार व्ही. व्ही. पवार, गोदाम व्यवस्थापक राम बनसोडे तसेच लिपिक लखन चव्हान यांनी ही कारवाई केली.