जिल्ह्यात निवडणूक प्रक्रियेसाठी 20 हजारांवर मनुष्यबळ

यवतमाळ, दि. 20 : 22 -  निवडणूक प्रक्रिया म्हटली की पुरेसे मनुष्यबळ हा महत्वाचा विषय असतो. आचारसंहिता लागण्यापूर्वी तीन-चार महिन्यांपासून प्रशासनाची तयारी सुरू असते. मतमोजणीपर्यंत ही सर्व प्रक्रिया यशस्वीपणे पार पाडण्याची संपूर्ण जबाबदारी मनुष्यबळाच्याच आधारे केली जाते. येत्या 11 एप्रिल रोजी 14 – यवतमाळ वाशिम लोकसभा मतदारसंघासाठी निवडणूक होत आहे. या प्रक्रियेसाठी जिल्ह्यात जवळपास 20 हजारांच्यावर अधिकारी – कर्मचारी नियुक्त करण्यात आले आहेत.

            संक्षिप्त मतदार याद्यांचा पुन:रिक्षण कार्यक्रमापासून जिल्हा प्रशासनाची निवडणुकीची तयारी सुरू होते. यात मतदार याद्या अद्ययावत करणे, नवीन मतदारांची नोंदणी, मयत तसेच स्थलांतरीत मतदारांची नावे वगळणे, अधिकारी व कर्मचा-यांचे प्रशिक्षण आदी कामांचा समावेश असतो. सद्यस्थितीत निवडणूक प्रक्रियेसाठी जिल्ह्यात 19 हजार 839 अधिकारी व कर्मचा-यांची प्रत्यक्ष मदत घेण्यात आली आहे. याव्यतिरिक्त इतरही निवडणूक विषयक कामे करण्यासाठी वेगवेगळ्या टिमचे गठण करण्यात आले आहे.  पोलिस विभागाच्या जवळपास साडेचार हजार अधिकारी व कर्मचा-यांवर निवडणुकीची जबाबदारी आहे. यात मतदान केंद्रांची सुरक्षा, जिल्ह्याची सीमाबंदी / नाकाबंदी, वाहनांची तपासणी, ईव्हीएम स्ट्राँग रुम आदींची सुरक्षा तसेच प्रतिबंधात्मक कारवायांचा समावेश आहे.

            जिल्ह्यात एकूण 2491 मतदान केंद्र आहेत. प्रत्येक मतदान केंद्रावर चार याप्रमाणे कर्मचा-यांची नियुक्ती करण्यात आली आहे. या केंद्रांवर मतदान केंद्राध्यक्ष म्हणून 3207 अधिकारी, मतदान अधिकारी म्हणून 3185 तर मतदान अधिकारी 2 व 3 म्हणून 8947 असे एकूण 15 हजार 339 अधिकारी व कर्मचारी यांची नियुक्ती झाली आहे. यापैकी 6392 कर्मचा-यांचे निवडणूक विषयक प्रशिक्षण पूर्ण झाले असून उर्वरीत अधिकार व कर्मचा-यांचे प्रशिक्षण घेण्यात येत आहे.

याशिवाय फिरते पथकाच्या 24 टीम असून यात 150 कर्मचारी, स्टॅटिक सर्व्हेलंन्ससाठी 24 टीम 120 कर्मचारी, व्हिडीओ सर्वेक्षण पथकाच्या 24 टीम 48 कर्मचारी, व्हीडीओ पाहणी पथकाच्या 8 टीम 24 कर्मचारी आणि खर्च तपासणी पथकाचे जवळपास 75 कर्मचारी अतिरिक्त आहेत.

यवतमाळ – वाशिम लोकसभा मतदारसंघात एकूण 2181 मतदान केंद्र आहेत. यासाठी एकूण 200 क्षेत्रीय अधिका-यांची नेमणूक करण्यात आली असून 10 हजार 905 अधिकारी – कर्मचारी उपलब्ध आहेत. यवतमाळ – वाशिम लोकसभा मतदारसंघात 29 स्थिर सर्व्हेक्षण पथक, 18 व्हीडीओ सर्व्हेक्षण पथक, 16 व्हीडीओ पाहणी पथक, 24 भरारी पथक, 14 अकांऊंटीग टीम, सात सहाय्यक खर्च नियंत्रक कार्यान्वित करण्यात आले आहेत. 

०००००