राज्यात जैविक वारसा क्षेत्रे निर्माण करण्याबाबत मुख्यमंत्र्यांच्या वनविभागास सूचना

Ø  गणेशखिंड पुणे व लांडोरखोरी  जळगाव नवीन जैविक वारसा क्षेत्र अधिसूचना अंतिम मान्यतेसाठी

यवतमाळ, दि. 21 : जैविक विविधता अधिनियम 2020 व त्या अंतर्गत जैविक विविधता नियम 2008 चे कलम 37 व नियम 22 नुसार मुख्यमंत्री उद्धव ठाकरे यांच्या सूचनेनुसार राज्यात जैविक वारसा क्षेत्र निर्माण करणार असल्याची माहिती वनमंत्री संजय राठोड यांनी दिली.

पुणे येथील गणेश खिड गार्डन येथे महात्मा फुले कृषी विद्यापीठ राहुरीचे झोनल कृषी संशोधन केंद्र असून येथील 33.01 हेक्टर क्षेत्र व जळगाव येथील लांडोरखोरी येथील 48.08  हेक्टर क्षेत्र जैविक वारसा क्षेत्र म्हणून घोषित करण्याची अधिसूचना मुख्यमंत्र्यांच्या अंतिम मान्यतेसाठी सादर करण्यात आली आहे. यापूर्वी राज्यात ग्लोरी ऑफ आल्लापल्ली, गडचिरोली हे पहिले जैविक वारसा क्षेत्र घोषित करण्यात आले असून भविष्यात जास्तीत जास्त जैविक वारसा स्थळे राज्यात घोषित करण्यात येणार आहेत, अशी माहिती वनमंत्र्यांनी दिली.

राष्ट्रीय जैविक विविधता मंडळ, चेन्नई यांचेकडून अशी जैविक वारसा स्थळे घोषित करण्याबाबत मार्गदर्शक सूचना राज्यांना प्राप्त झाल्या आहेत. राज्यात जैविक विविधता मंडळ, नागपूर येथे कार्यरत असून राज्यातील जैविक विविधतेबाबत कामकाज करत आहे. गणेशखिंड गार्डन, पुणे येथे पिकांच्या 49 जाती, फळांच्या 23 जाती उपलब्ध आहेत. या गार्डनमध्ये 35 विविध क्षेत्र असून तेथे विविध वृक्ष व फळझाडे आहेत. यापैकी काही वृक्ष हे 100 वर्ष जुने आहेत. गणेशखिंड या केंद्राने विविध पिके व फळे यांच्या 19 जाती प्रसारित केल्या आहेत.

पेशव्यांच्या काळात या भागात आंब्याची बाग विकसित करण्यात आली होती. ब्रिटिशांच्या कारकीर्दीत गव्हर्नर जनरल सर जॉन माल्कम यांनी हे उद्यान विकसित केले. काही वर्षांनंतर जॉर्ज मार्शल वूड्रो यांनी 1873 मध्ये या बोटॅनिकल गार्डनची जबाबदारी स्वीकारली. पुढे राहुरी कृषी विद्यापीठाने या उद्यानाला स्वतःच्या कार्यक्षेत्रात सामावून घेतले. आणि त्या पेशवेकालीन आंब्याच्या बागेचे आणि जुन्या झाडांचे संवर्धन केले आहे. उद्यानाच्या सर्व स्थित्यंतरांची कागदपत्रेही उपलब्ध आहेत.                     

जैववैविध्याचा अनमोल ठेवा संपादन करा : या गणेशखिंड फळ संशोधन केंद्राच्या पेशवेकालीन आंब्याच्या बागेतील आंब्याची जात हा इतरत्र न आढळणारा जनुकीय ठेवा आहे. याशिवाय, या बागेत 165 प्रकारची जंगलात आढळणारी झाडे आहेत. यातील 48 वनस्पती औषधी आहेत. दुर्मिळ प्रकारातील बुरशी, सूक्ष्म जीवांच्याही नोंदी आहेत. विद्यापीठाने या बागेचे बायोडायव्हर्सिटी रजिस्टर तयार केले असून यात वनस्पतींबरोबरच सरपटणारे प्राणी, कासव, बेडूक, किडे आणि तेथील सर्व पिकांची सविस्तर माहिती आहे

लांडोरखोरी, जळगाव हे स्थळ राखीव वन क्षेत्रात असून जळगाव वन विभागाच्या अखत्यारीत आहे. याबाबत जळगाव नगरपालिकेची संमती ठराव प्राप्त झाला आहे. या क्षेत्रावर बोरीची झाडे असून येथे विविध पक्षी व प्राण्यांचा अधिवास आहे. तसेच लांडोरखोरी हे क्षेत्र मोर या पक्षाचे अधिवास केंद्र आहे.  जळगाव वनविभागाने गत पाच वर्षांपासून जाणीवपूर्वक प्रयत्न करून हिरवा पट्टा विकसित केला आहे. समृद्ध जैवविविधतेने संपन्न अशा खैर, नीम, अंजन, बोर, बाभूळ, काटेसावर, शेवगा, आपटा, हेंकळ यासारख्या 70 हून अधिक वनस्पतींच्या प्रजाती या ठिकाणी आहेत. तर रानडुकर, चिंकारा, निलगाय, ससा, मुंगुस, मोर सारख्या सस्तन प्राण्यांचा वावर, दगड पाल, साधी पाल, उद्यान सरडा, शामेलीयन, धामण, कवड्या, तस्कर सारख्या सरपटणाऱ्‍या प्राण्यांच्या 15 पेक्षा जास्त प्रजातीही येथे आहेत. तसेच चंडोल, कापशी, सोनपाठी सुतार, कोतवाल, युरोपियन चाष, शिक्रा इत्यादी स्थानिक व स्थलांतरी पक्षांच्या 68 प्रजाती येथे आढळून येतात. या 48.08  हेक्टरपैकी दहा हेक्टरमध्ये हे वनोद्योन विकसित केले गेले आहे.

अशा प्रकारे जैविक वारसा स्थळे निर्माण केल्याने या क्षेत्रातील प्राणी ,पक्षी,वनस्पती संवर्धन योजना तयार करण्यात येऊन प्रजातीचे मूळ स्थळी संवर्धन व वंशवृद्धी करण्यात येत असल्याने राज्यात अशी अनेक ठिकाणे जैविक वारसा स्थळे म्हणून घोषित करणार असल्याची माहिती वनमंत्री संजय राठोड यांनी दिली.

००००००