अमरावती पदवीधर मतदार संघ निवडणूक_
मतदान केंद्राध्यक्ष व अधिकाऱ्यांना दुस-या टप्प्यातील प्रशिक्षण*
आपली जबाबदारी दक्षतापूर्वक पार पाडावी*
सहाय्यक निवडणूक निर्णय अधिकारी अमोल येडगे*
यवतमाळ दि. २४ : निवडणूक प्रक्रियेत मतदान केंद्राध्यक्ष, मतदान अधिकारी यांची जबादारी महत्त्वपूर्ण असून सर्व प्रक्रिया दक्षतापूर्वक पार पाडावी, असे निर्देश सहाय्यक निवडणूक निर्णय अधिकारी तथा जिल्हाधिकारी यांनी दिले.
अमरावती विभाग पदवीधर मतदार संघ व्दिवार्षिक निवडणूक २०२३ कार्यप्रणालीबाबत मतदान केंद्राध्यक्ष, मतदान अधिकारी यांचे एक दिवसीय दुसरे प्रशिक्षण आज बचत भवन येथे आयोजित करण्यात आले होते. यवतमाळ जिल्ह्यात ४८ मतदान केंद्र असून त्यासाठी मतदान केंद्राध्यक्ष, मतदान अधिकारी व संबंधितांच्या ५३ चमू तयार करण्यात आल्या आहेत. त्यातील ५ चमू राखीव ठेवण्यात येणार आहे. मतदान प्रक्रियेमध्ये २७६ अधिकारी, कर्मचारी सहभागी आहेत. या सर्वांना द्वितीय टप्प्यातील प्रशिक्षण उपजिल्हाधिकारी निवडणुक डॉ. स्नेहल कनिचे आणि तहसिलदार राजेंद्र चव्हाण यांच्या मार्गदर्शनाखाली देण्यात आले.
सहायक निवडणूक निर्णय अधिकारी तथा जिल्हाधिकारी अमोल येडगे यांच्या प्रमुख उपस्थितीसह उपजिल्हा निवडणूक अधिकारी डॉ. स्नेहल कनिचे, नोडल अधिकारी ललितकुमार वऱ्हाडे, तसेच इतर अधिकारी यावेळी उपस्थित होते.
प्रशिक्षणामध्ये मतदानाच्या विविध टप्प्यातील प्रक्रिया पावरपॉईंट प्रात्यक्षिकेव्दारे सादर करण्यात आले. यामध्ये मतदान पध्दतीबाबत सूचना, मतदान प्रतिनिधींना मार्गदर्शक सूचना, मतदान केंद्राध्यक्ष, मतदान अधिकारी यांची कर्तव्ये व जबाबदाऱ्या यासह मतपेट्या उघडणे, बंद करणे, सीलबंद करणे, कागदी सील, पोस्टल बॅलेट, मतपत्रिका व मतदान यादीची तपासणी याबाबत प्रात्यक्षिकेव्दारे माहिती देण्यात आली. तसेच आज डमी मतदान केंद्र उभारुन मतदानाचे प्रात्यक्षिक घेण्यात आले. शिवाय प्रशिक्षणार्थिंची परीक्षा सुद्धा घेण्यात आली.
मतदान 30 जानेवारीला सकाळी 8 ते 4 या वेळेत होणार आहे. त्यानंतर मतमोजणी 2 फेब्रुवारी रोजी होणार आहे. या अनुषंगाने मतपत्रिकेची तपशीलावर माहिती देण्यात आली. मतदार यादी, मतदाराचा अनुक्रमांक याबाबत घ्यावयाच्या दक्षतेबाबत मार्गदर्शन करण्यात आले. यावेळी मतदान केंद्राध्यक्ष, मतदान अधिकारी यांनी उपस्थित केलेल्या प्रश्नांचे प्रशिक्षकांमार्फत निरसन करण्यात आले.
औद्योगिक प्रशिक्षण संस्थेमध्ये शिकाऊ उमेदवार भरती मेळावा
१६ ते २१ हजार दरमहा वेतन : अखिल भारतीय व्यवसाय परीक्षा अंतर्गत जुलैमध्ये आयटीआय परीक्षेचे निकाल घोषित झालेले आहेत. उत्तीर्ण प्रशिक्षणार्थ्यांना शिकाऊ उमेदवारी तसेच रोजगाराची संधी उपलब्ध व्हावी यासाठी यवतमाळच्या आयटीआयमध्ये सुझुकी मोटर गुजरात प्रा. लिमिटेड हंसलपुर, गुजरात या नामांकित कंपनीचा भरती मेळावा २२ सप्टेंबर रोजी सकाळी ९.३० वाजता आयोजित केला आहे. या कंपनीमार्फत अॅप्रेन्टीस करीता १६ हजार ९०० तसेच फिक्स टर्म करीता २१ हजार दरमहा वेतन दिले जाणार आहे. या मेळाव्यामध्ये फिटर, टर्नर, वेल्डर, मशिनिस्ट, इलेक्ट्रीशियन, मोटार मेकॅनिक व्हेईकल, मेकॅनिक डिझल, मेकॅनिक ट्रॅक्टर, टुल अॅण्ड डायमेकर, पिपीओ व पेन्टर जनरल व्यवसायासाठी जागा उपलब्ध आहेत. यासाठी इयत्ता १० वी मध्ये किमान ४० टक्के गुण, आयटीआयमध्ये किमान ५० टक्के गुण तसेच रूजु होतेवेळी वय १८ ते २४ वर्ष असणे आवश्यक आहे. या संधीचा जिल्ह्यातील सर्व पात्र उमेदरावांनी फायदा घ्यावा, असे आवाहन संस्थेचे प्राचार्य व्ही. जे. नागोरे यांनी केले आहे.
Comments
Post a Comment