राष्ट्रीय मतदार दिवसानिमित्त रॅलीचे आयोजन
यवतमाळ, दि. २४ जानेवारी (जिमाका):- राष्ट्रीय मतदार दिवसानिमित्त २५ जानेवारी रोजी रॅलीचे आयोजन करुन मतदान यादीतील नाव नोंदणी व मतदानाचा हक्क याबाबत जनजागृती करण्यात येणार आहे. २५ जानेवारी २०२३ रोजी आझाद मैदान यवतमाळ येथे सकाळी साडेसात वाजता रॅलीचा शुभारंभ होणार असून यामध्ये ५०० विदयार्थी उपस्थित राहणार आहे. सदर रॅली ही आझाद मैदान-पोलीस स्टेशन यवतमाळ-नेताजी चौक-बस स्टॅन्ड-एल.आय.सी.चौक या मार्गाने मार्गक्रमण करुन बचत भवन जिल्हाधिकारी कार्यालय यवतमाळ येथे सामारोप होणार आहे अशी माहिती तहसिलदार तथा सहाय्यक मतदार नोंदणी अधिकारी कुणाल झाल्टे यांनी दिली आहे. नागरिकांनी यात सहभागी होण्याचे त्यांनी आवाहन केले आहे.
औद्योगिक प्रशिक्षण संस्थेमध्ये शिकाऊ उमेदवार भरती मेळावा
१६ ते २१ हजार दरमहा वेतन : अखिल भारतीय व्यवसाय परीक्षा अंतर्गत जुलैमध्ये आयटीआय परीक्षेचे निकाल घोषित झालेले आहेत. उत्तीर्ण प्रशिक्षणार्थ्यांना शिकाऊ उमेदवारी तसेच रोजगाराची संधी उपलब्ध व्हावी यासाठी यवतमाळच्या आयटीआयमध्ये सुझुकी मोटर गुजरात प्रा. लिमिटेड हंसलपुर, गुजरात या नामांकित कंपनीचा भरती मेळावा २२ सप्टेंबर रोजी सकाळी ९.३० वाजता आयोजित केला आहे. या कंपनीमार्फत अॅप्रेन्टीस करीता १६ हजार ९०० तसेच फिक्स टर्म करीता २१ हजार दरमहा वेतन दिले जाणार आहे. या मेळाव्यामध्ये फिटर, टर्नर, वेल्डर, मशिनिस्ट, इलेक्ट्रीशियन, मोटार मेकॅनिक व्हेईकल, मेकॅनिक डिझल, मेकॅनिक ट्रॅक्टर, टुल अॅण्ड डायमेकर, पिपीओ व पेन्टर जनरल व्यवसायासाठी जागा उपलब्ध आहेत. यासाठी इयत्ता १० वी मध्ये किमान ४० टक्के गुण, आयटीआयमध्ये किमान ५० टक्के गुण तसेच रूजु होतेवेळी वय १८ ते २४ वर्ष असणे आवश्यक आहे. या संधीचा जिल्ह्यातील सर्व पात्र उमेदरावांनी फायदा घ्यावा, असे आवाहन संस्थेचे प्राचार्य व्ही. जे. नागोरे यांनी केले आहे.
Comments
Post a Comment