सणासुदीत खाद्य पदार्थांची तपासणी मोहीम

अन्न व औषध प्रशासनाचा पुढाकार Ø 191 नमुने तपासणीसाठी अन्न प्रयोगशाळेत अन्न व औषध प्रशासन कार्यालयाकडून यवतमाळ शहर व जिल्ह्यात सणासुदीच्या काळात किरकोळ व घाऊक अन्न पदार्थ विक्रेते तसेच हॉटेल व्यावसायिक व मिठाई उत्पादनाची तपासणी मोहिम राबविण्यात येत आहे. जनतेस सुरक्षित खाद्य पदार्थ उपलब्ध व्हावेत यासाठी शहर व संपूर्ण जिल्ह्यात अन्न व्यवसायिकांच्या तपासण्या करण्यात आल्या.या तपासणीत खाद्य तेल, मिठाई, दुध व दुग्धजन्य पदार्थ, खवा, पनीर व इतर खाद्य पदार्थांचे नियमित व सर्वेक्षण मिळून एकूण 191 नमुने तपासणीसाठी शासकीय अन्न प्रयोगशाळेत विश्लेषणासाठी पाठविण्यात आलेले आहेत. या अन्न नमुन्यांचे कार्यालयास प्राप्त अहवालापैकी खाद्य तेलाचे दोन, पनीर एक, दुध एक व इतर खाद्य पदार्थाचे पाच अहवाल अप्रमाणित आलेले आहेत. अप्रमाणित अहवालावर नियमानुसार पुढील कार्यवाही करण्यात येत आहे. जिल्ह्यातील हॉटेल व्यावसायिक व मिठाई उत्पादक तसेच विक्रेत्यांना जनतेच्या आरोग्याच्या दृष्टीने अन्न पदार्थ तयार करण्याची जागा, साठविण्याची जागा स्वच्छ ठेवणे, मिठाई तयार करण्याचे टेबल व बाक, खाद्य पदार्थ भांडे, अन्न पदार्थ वितरीत करावयाच्या प्लेट्स स्वच्छ ठेवण्याच्या सूचना देण्यात आल्या आहेत. तसेच अन्न पदार्थ हाताळणाऱ्या अन्न व्यावसायिक व कामगारांनी सुयोग्य, स्वच्छ, स्वरक्षीत कपडे, टोपी, गरज असल्यास हातमोजे याचा वापर करावा. जनतेला ताजे, सुरक्षीत अन्न मिळावे, असे आवाहन अन्न व औषध प्रशासन सहायक आयुक्त गोपाल माहोरे यांनी अन्न व्यवसायिकांना केले आहे.