कन्यादान योजनेचा लाभ घेण्याचे आवाहन
एकात्मिक आदिवासी विकास प्रकल्प कार्यालय पुसदच्यावतीने प्रकल्पातील तालुक्यांमध्ये कन्यादान योजना राबविण्यात येत आहे. या योजनेचा लाभ घेण्याचे व स्वयंसेवी संस्थांनी योजनेंतर्गत विवाह सोहळा आयोजित करण्यासाठी प्रस्ताव सादर करण्याचे आवाहन करण्यात आले आहे.
पुसद प्रकल्पातील पुसद, दिग्रस, आर्णी, दारव्हा, उमरखेड व नेर या तालुक्यातील आदिवासी भागात विवाह सोहळ्यामध्ये सहभागी होणाऱ्या नवदाम्पत्यांना आर्थिक सहाय्य देण्यासाठी कन्यादान योजना राबविण्यात येत आहे. इच्छुक व पात्र सेवाभावी स्वयंसेवी संस्थांनी योजनेंतर्गत सामुहिक विवाह सोहळ्याचे आयोजन करण्याकरीता विहीत नमुन्यातील आवेदन व परीपुर्ण प्रस्ताव प्रकल्प अधिकारी, एकात्मिक आदिवासी विकास प्रकल्प पुसद येथे दिनांक २६ फेब्रुवारी पर्यंत सादर करावे.
योजनेच्या विवाह सोहळ्यात वर व वधु यांचे वय विवाहाच्या दिनांकास ३५ वर्षापेक्षा जास्त असू नये, वधु वराचा प्रथम विवाह असणे आवश्यक आहे, नवदाम्पत्यापैकी एकजन अनुसूचित जमातीचा असावा, विवाह नोंदणी प्रमाणपत्र, रहिवासी प्रमाणपत्र व जोडप्यापैकी एकाचे जातीचे प्रमाणपत्र आवश्यक आहे.
बालविवाह प्रतिबंधात्मक कायदा व हुंडा प्रतिबंधक कायदा अंतर्गत कोणत्याही कलमाचा भंग झालेला नसल्याचे प्रतिज्ञापत्र, विवाह सोहळा आयोजित करण्यासाठी कार्यालयाची परवानगी घेणे आवश्यक आहे. वधु व वराचे बँक खाते क्रमांक जोडणे आवश्यक आहे. विवाह सोहळा आयोजित करणाऱ्या स्वयंसेवी संस्थेस प्रति १० जोडपे १० हजार व लग्न सोहळ्यात भाग घेणाऱ्या जोडप्याना १० हजार इतके अनुदान देण्यात येते, असे प्रकल्प कार्यालयाच्यावतीने कळविण्यात आले आहे.
000
Comments
Post a Comment