डॉ. झाकीर हुसेन मदरसा आधुनिकीकरण योजना
Ø प्रस्ताव सादर करण्याची मुदत 31 ऑगस्ट 2022
Ø
यवतमाळ, दि 24 जून, (जिमाका) :- राज्यातील नोंदणीकृत मदरसांच्या आधुनिकीकरणासाठी डॉ.झाकीर हुसेन मदरसा आधुनिकीकरण योजना 11 ऑक्टोबर 2013 च्या शासन निर्णयानुसार कार्यान्वीत करण्यात आली आहे. सदर योजनेचा लाभ घेण्यासाठी मदरसा चालविणाऱ्या संस्था धर्मादाय आयुक्त अथवा महाराष्ट्र राज्य वक्फ बोर्डाकडे नोंदणीकृत असणे आवश्यक आहे. या योजने अंतर्गत विज्ञान, गणित, समाजशास्त्र, हिंदी, मराठी, इंग्रजी व उर्दू हे विषय शिकविण्याकरीता शिक्षकांना मानधन, पायाभूत सुविधांसाठी व ग्रंथालयासाठी अनुदान अनुदान देण्यात येते.
शासन निर्णयातील तरतुदीनुसार जास्तीत जास्त 3 डी.एड/बी.एड शिक्षकांना मानधन अनुज्ञेय आहे. ग्रंथालयासाठी तसेच शैक्षणिक साहित्यासाठी फक्त प्रथम वर्षी रु.50 हजार व तद्नंतर प्रति वर्षी रु.5 हजार अनुदान देय आहे. तसेच पायाभूत सुविधांसाठी जास्तीतजास्त रु. 2 लाख अनुदान देय आहे. पायाभूत सुविधांपैकी ज्या प्रयोजनांसाठी यापूर्वी अनुदान देण्यात आले आहे, त्या प्रयोजनासाठी पुन्हा अनुदान अनुज्ञेय असणार नाही.
ज्या मदरसांना स्किम फॉर प्रोव्हायडींग क्वालीटी एज्युकेशन इन मदरसा या केंद्र पुरस्कृत योजनेअंतर्गत लाभ मिळाला आहे, अशा मदरसांना सदर योजनेचा लाभ घेता येणार नाही. इच्छुक मदरसांनी 2013 च्या शासन निर्णय मध्ये नमुद केलेला विहित नमुन्यातील परिपुर्ण प्रस्ताव आवश्यक कागदपत्रासह 31 ऑगस्ट 2022 पुर्वी जिल्हा नियोजन समिती, जिल्हाधिकारी कार्यालय,यवतमाळ येथे सादर करावा, असे जिल्हाधिकारी अमोल येडगे यांनी कळविले आहे.
Comments
Post a Comment