धार्मिक अल्पसंख्यांक विद्यार्थीबाहुल शाळेत

पायाभूत सोयी-सुविधेसाठी रुपये दोन लक्ष अनुदान योजना Ø प्रस्ताव सादर करण्याची मुदत 31 जुलै 2022 यवतमाळ, दि 24 जून, (जिमाका) :- धार्मिक अल्पसंख्यांक विद्यार्थ्यांचे बाहुल्य असलेल्या शासन मान्यताप्राप्त अनुदानित / विना अनुदानित शाळा, कनिष्ठ महाविद्यालये, औद्योगिक प्रशिक्षण संस्था, नगरपालिका/नगरपरिषद शाळा व अपंग शाळांमध्ये पायाभूत सोयी-सुविधा उपलब्ध करुन देण्यासाठी रुपये दोन लक्ष अनुदान देण्याची योजना महाराष्ट्र शासन, अल्पसंख्यांक विकास विभागाच्या 7 ऑक्टोबर 2015 च्या शासन निर्णयान्वये कार्यान्वीत करण्यात आली आहे. सदर योजनेचा लाभ घेण्यासाठी उपरोक्त नमूद शाळा/संस्थांमध्ये अल्पसंख्यांक (मुस्लिम,ख्रिश्चन, शीख, पारसी, जैन ) विद्यार्थ्यांची संख्या किमान 70 टक्के तसेच शासनमान्य खाजगी अपंग शाळांमध्ये अल्पसंख्यांक विद्यार्थ्यांची संख्या किमान 50 टक्के असणे आवश्यक आहे. कनिष्ठ महाविद्यालय व औद्योगिक प्रशिक्षण संस्थांच्या अभ्यासक्रमांच्या समकक्ष दर्जा देण्यात आलेले अभ्यासक्रम चालविणाऱ्या शाळा व व्यावसायिक शिक्षण संस्था तसेच स्वयं-अर्थसहाय्यित शाळा या योजनेंतर्गत अनुदानासाठी पात्र असणार नाहीत. महानगरपालिका व जिल्हा परिषद या स्थानिक स्वराज्य संस्थांच्या अधिपत्याखाली चालविण्यात येत असलेल्या शाळा, कनिष्ठ महाविद्यालये व अपंग शाळा या योजनेसाठी पात्र असणार नाहीत. तसेच यापूर्वी या योजनेंतर्गत 5 वेळा अनुदान प्राप्त केलेल्या शाळा/संस्था देखील अनुदानासाठी पात्र ठरणार नाहीत. यवतमाळ जिल्ह्यातील सदर योजनेचा लाभ घेण्यासाठी इच्छुक शाळा /संस्थांनी शासन निर्णय दिनांक 7 ऑक्टोबंर 2015 मध्ये नमुद केलेल्या इतर अटी व शर्तीस अनुसरुन विहित नमुन्यातील परिपुर्ण प्रस्ताव आवश्यक कागदपत्रे जोडून जिल्हा नियोजन समिती, जिल्हाधिकारी कार्यालय, यवतमाळ येथे 31 जुलै 2022 पर्यंत सादर करावा, असे जिल्हाधिकारी अमोल येडगे यांनी कळविले आहे.